বিষ্ণুপুরর হেইরোক

 আজিত্ত দশক আহান আগে মণিপুরর পরিস্থিতি হান আজিকার ডেকি নেয়সিল। ভিতরর উতার উপদ্রব নিয়াম অয়া আসিল। ভিতরর ঔতায় লেরিকে কিতাত বিষ্ণুপ্রিয়া মণিপুরীর বিষয় লো লেখা থাইলে সিরিয়া বেল্লা, বেন করলা; এহান আমারে এমারিকার মণিপুর পাকদানিত ঔপেইত থাইতারা নিজরে বিষ্ণুপ্রিয়া মণিপুরী বুলিয়া পরিচয় দিতারা মানু কতগয় মাতলা। তানুরে হুদ্দা বিষ্ণুপ্রিয়া মণিপুরী মানু বুল্লে লালইতই, বিষ্ণুপ্রিয়া মণিপুরী এক্টিভিষ্ট বুল্লে চুমইতই। কারণ হান অইলতায় তানু প্রতিকুল পরিস্থিতিত থায়া বিষ্ণুপ্রিয়া মণিপুরীর কা কাম করিয়া যিতারাগা। এতারমা আগো অইলতায় ছবি হানাত কলাসরর অজা প্রতাপ সিংহ গিরকর বাঙেদে উবা অয়া আসে গিরক এগো, নাঙ হান শান্ত মাইবম। গিরক বিষ্ণুপুর জেলার 'হেইরোক' গাঙর গো। 'হেইরোক' বারো 'খঙ্গবোক' গাঙর মানু এতা মাদৈ-গাঙ বুলিয়া কত্তহান লেখাত পাসিলু ( রেফারেন্স এব্বাকা দিয়া নুওয়ারলু, পিসে পেইলে দিতৌ)। শান্ত গিরক নিজরে বিষ্ণুপ্রিয়া মণিপুরী গো বুলিয়া হারপাসে। গিরকর বাপকও নিজরে বিষ্ণুপ্রিয়া মণিপুরী গো বুলিয়া পুতকরাঙ বাগাসে, তা নিজে কুঠি চেইলো বুজন আগো। শান্ত গিরকর বাপক জিংতা অয়া থাইতে তানুরাং সাধুবাবার জন্মশতবার্ষিকী অনুষ্ঠান দ্বিখুরুম করেসি অনিল সিংহ গৌতম অজার নেতৃত্ব লো। অনিল সিংহ গৌতম অজা গিরকর মণিপুরর ঔ প্রতিকুল পরিস্থিতি উহানাত আমার মানুর গাঙ উতাত গিয়া জাগরন আনানির হৎনা করানি বারো সাধুবাবার জন্মশতবার্ষিকী অনুষ্ঠান হাঞ্জানি হানরে বাখান দিয়া লম নায়তই। শান্ত গিরকে বিষ্ণুপ্রিয়া মণিপুরী ও.বি.সি মণিপুরে পানারকা দাবি করানিরকা বুলিয়া নিজর গাঙর মানুর লগে টটরানি অকরল, সিগনেচার কেম্পেইন আহানউ অকরেসিল, কিন্তু গাঙর কতগ মানুয়ে তারে নিয়াম লাক্লা দিলা, এমনকি কিলেয়া তার মেইথং কিতাও ফুলা দেসিলা। কিন্তু গিরক এবাকাও নিজরে বিষ্ণুপ্রিয়া মণিপুরী বুলিয়া পরিচয় দের। আসামর আমার বিষ্ণুপ্রিয়া মণিপুরী মুনি-সৌ আগ হারি বসর তার উপেইত গিয়া ১৫-২০ দিন থারগা। এবাকা মণিপুরর অবস্থা হান হবা অনি অকরল হান্তে, মুঙেদে হবা দিন আহের বুলিয়া আশা আসে।

ছবি হানাত শান্ত গিরকর দৌ অসি মালক বারো ববাকর ( মালকর মালক) ছবি দেনা অইল।

মণিপুরে আমার মানু এতার বারে হবাকো হারপানি মনেইলে গাঙ উতাত গিয়া না আটলেগা, গাঙর মানু উতার লগে না টটরলেগা হুত্তুমে উহান হারপানি চিলৈতৈ।