বিষ্ণুপ্রিয়া মণিপুরি এথনিক ফ্লেগঃ

এথনিক ফ্লেগর মানে হান ঐলতাই 'An ethnic flag is a flag that symbolizes a certain ethnic group. Ethnic flags are often introduced to the ethnic community through the respective cultural or political ethnic movements. They are popular among diasporas, ethnic minorities, and some ethnic majorities, especially in multiethnic countries.' ভারতর ডেকি ডাঙর মাল্টি এথনিক দেশ এহানাত হুরকাং এথনিক জাতি এতা নিজর জাতর অস্তিত্ব জিংতা করানিরকা তৎপর অসি, উহানে তানু নিজর জাতর এথনিক ফ্লেগ আহান লেপকরেসি জেহানর তলে তানু জাতর বিষয় লো হাবি এক অয়া হমেইতারাগা, জেহানে তানুরে এক করে পারের। এমনকি ডাঙর এথনিক জাতি উতারতাও এথনিক ফ্লেগ আসে যেমন নাগা, বোরো, ডিমাসা, কুকি, মৈতৈ ইত্যাদি। আমার ডেকি হুরকাং জাত আহানাত এমাটিক খেইনা-খেইনি আসে, ফিরাল আহানর দরকার পরের জেহানর তলে আয়া হাবি হমেয়া এক অ'পারানি। যে ফিরাল হানে হাবি ধরণর খেইনাপারে এক করিয়া বিষ্ণুপ্রিয়া মণিপুরি জাতি হানরে সিম্বলাইজ করে পারতই।

বিষ্ণুপ্রিয়া মণিপুরির হাবিত্ত পুরানা লিখিত ইতিহাস হান ঐলতাই 'খুমল পুরাণ' জেহান মণিপুর রাজার রাজকনুঙর পন্ডিত নবখেন্দ্রই মৈতৈ ঠারে লিখেসে, বারো জেহানরে শ্রী নবদ্বীপ সিংহ গিরকে মৈতৈ ঠার হানাত্ত ইমা ঠার বারো ইংরাজিত অনুবাদ করেসে। লেরিক এহানাত সেঙকরে লিখা আসে নিংথৌনাই (অর্থাৎ রাজার গাং) বারো লৈমানাই (অর্থাৎ মাদৈ গাং) এতা লকতাক হ্রদ গর মুঙ বারো পিঠি বারাদে নিংথৌ ((অর্থাৎ রাজা) বারো লৈমার((অর্থাৎ মাদৈ) বি-ক্ষেতি করিয়া গাঙ পালয়া আসি।

লকতাক হ্রদ গর মুঙেদে পরেসি মাদৈগাং গাঙ হানি ঐলতাইঃ খাঙাবক, হৈরক, ককচিং ইত্যাদি।

লকতাক হ্রদ গর পিঠিয়েদে পরেসি রাজারগাং গাঙ হানি ঐলতাইঃ নিংথৌখোং, নাচৌ, ঙাইখোং ইত্যাদি।

বারো এরে মাদৈগাং বারো রাজারগাং এতারে শান্তিদাস গোসাইয়ে নোংখ্রাং পহুরিগৎ বুরদিয়া সেঙয়া রামাউতী ধর্ম (রাম প্রভুর উপাসনা ধর্ম) লনারকা মাতল উপেইত তানুর খুমল রাজা গিরকে নাকরল বারো মাতল 'আমিতে বিষ্ণূ মন্দির গত বিষ্ণূর উপাসনা করিয়ার হান্তে আমি সেঙয়া আসি, আমারতা আরতা সেঙনি না লাগের। খুমল রাজার কথা হুনিয়া গোসাইয়ে মাতল 'তুমিতে বিষ্ণুরে নিয়াম নিঙকররাই হান্তে তুমার এরে গোষ্ঠী এহানরে বিষ্ণুপ্রিয়া বুলিয়া নাঙ হান দিলু'।

খুমল পুরাণ লেরিক হানাত্ত গজে ইকরেসু তথ্য এহানিয়ে মাতেরতাই বিষ্ণুপ্রিয়া মণিপুরি জাতি এহান ঐলতাই মণিপুরর ঔ এথনিক মণিপুরি জাতি হান জেতাই বিষ্ণু মন্দিরগত বিষ্ণু উপাসনা করিয়া আসিলা। তানুরে নিংথৌনাই (অর্থাৎ রাজার গাং) বারো লৈমানাই (অর্থাৎ মাদৈ গাং) বুলিয়া চিনলা বারো তানু লকতাক হ্রদ গর মুঙেদে বারো পিঠিয়েদে আলাদা অয়া গাঙ পালয়া আসি।

এরে তথ্য এতারে নিঙকরিয়া 'বিষ্ণুপ্রিয়া মণিপুরি' জাতির কা এরে এথনিক ফিরাল এহান মনহানাত আহিল হান্তে হাবিরাং শেয়ার করলু। এহানাত হাবির মতামত পানা মনাউরি, হবাও বালা সাক্তিও বালা।

হোমা হাবিরে।

Firaal Prosongey

E-photok got dehiyaar Firaal ehaani aamarhaan naagoi, Thailand'r haan. Aamar songskritit Manipur'r kadar south east Asian country bises korey Thailand baro Myanmar/Burma'r probhab aase. Thailand'r ere firaal'r design baro aamar firaal'r design haan dehiya dyotaar haadit songskriti aadan prodaan ona baa probhabito onar sombhabona aase. Baro aami dou kormot bebohar koriyaar nipple design'r Selpung ehanor utpotti Burma't. Manipur laam belanir pise thol'r maanur kadat thaite thaite South-East Asia'r culture 'r probhab'etto durei o jiyarga.

Transition of culture with time.

PC: Robin Kumar Singha ( My younger brother)

'Bishnupriya Manipuris in Myanmar' article got place in the journal of Myanmar Cultural Research Society

 'Bishnupriya Manipuris in Myanmar' article got place in the journal of Myanmar Cultural Research Society.

One more article on 'Akkabat' whose language is identical with Bishnupriya Manipuris is also there in the journal but the article is in Burma langauge. English version of the article will be shared after few days. The writer is in contact.

PDF copy of the journal can be downloaded from the link below

https://drive.google.com/.../1UPMYcy_VGY1X9l9Xtoq.../view...

মুঙেদে ঙালইতই, সইনেই

হাইহান এহান, এব্বাকা 'ছ' বারো ' স' লো খানি থেইনা অসি; রাজারগাঙ-মাদইগাঙ লো এবাকাও কতগই খেইনা-খেইনি করানি মনেইতারা; উত্তর শিওর- দক্ষিণ শিওর, ঘাগারা-চেংকুরি লোও দিতুপ অসি, আরতাও কততা থা থাইব।

হে নুওয়া প্রজন্ম, আধার হান নিয়াম অসে হাইহান, বৌ-বরণর লগে দৌ জিল্কার হাইহান, ডরও লাগের হাইহান; কিন্তু না পাহুরবাং রাতি হান ফুওইতই সইনেই, বিয়ান হান অইতই সইনেই, আবকচা নুওয়ারা লো হিনপেইরি ইমা (বিষ্ণুপ্রিয়া মনিপুরি)রে মেইপা-খুড়ারেলো বিয়ানে পাহাঙপা গিরকরে চাপাল আহান দিয়া বালা করতাঙাই সইনেই।

না পাহুরবাঙ আপা-বপারে। নিজর ঘর, লাম, খেতি, লকতাক বারো নিজর কততারে বেলেয়া মণিপুর মাটিত্ব টেঙারা, খাল, বিল লালয়া আয়া লাম পাতেসিগাতা; জেহানর কারণে আজি আমি নিজর পরিচয় আহানল জিংতা অয়া আসিতা। আমার আপা-বপা গাসিয়ে যে খারাপ দিন অউবাকা দেহেসি, অউতার কিঞ্চিত আহানও নাগই এবাকার দেহিয়ার খারাপ দিন এতা। তানুও মন না বাগিয়া পরিস্থিতির লগে লাকাটি দিয়া জিঙিয়া আজি আমারে এপেইত ফউকরলাগাতা, আমিও আমার আপা-বপার দেকি মন না বাগিয়া মেইথি অইক, মুঙেদে ঙালইতই সইনেই।

মণিপুরে বেলেয়া আহেসিলা নিজর বেইবুনি অউতার কততারে মায়ান্মারে যুদ্ধ- বন্দি করিয়া নিয়া গেসিলাগা অউতাই কতদিন নিজর ইমার ঠার হান জিংতা করিয়া থসিলা, কিন্তু কাদাবারার ডরে এবাকা ঠার হান মিমুত অনার পথে, পরিচয় হান্তে মাংকরিয়া হদাসি। মণিপুরে আসি উতাও জিংতা অয়া থানার কারণে খাই অলয়া আসি। এতা হাবি হিনর দিন এতা দেহিয়াও আমার আপা-বপাই ঠু-নিংশা বেলাসি হাইহান, কিন্তু আশা না এরাদেসি। আমারে পথ দেহুয়াসি, পরিচয় দেসি, পরিস্থিতির লগে লাকাটি ধরেসি।

এবাকা, আপা-বপা তোমার অউগদে চেয়া আসি। তুমিই আশা, তুমিই ভবিষ্যৎ। চেরৌর দিনে তুমি দিতারাই চাক-লুক হান বাসেয়া আসি আপা-বপাই। কিতা করতারাই, তুমি চেই।

All

তম্বি আবকর ফুংকা য়ারি

১৯৯৪-৯৫ ইং মারির উগদে তম্বী আবকর বয়স ৫৪-৫৫ অ থাইব। বিয়া অয়া গাঙে আহানির পিসে সংসার হান সৌ-শুমারা লো পইলাদে খানি হিনপেইল, তেইর গিরক অউগ নুওয়ারা-পানিল খেতির কাম নিয়াম করে নুওয়ারানির কারণে। বিয়ানে কওয়া গর কা করানির আগে তেই ঘুমেত্ত উঠিয়া, লাঙৌ হান য়াত কাকরিয়া ফিতুপ আহান বেরেয়া বারো আরাক ফিতুপ আহান মুরগত বাধিয়া বিড়ি আগ জ্বালেয়া লপুকেদে নিকুলতইগ। লপুকর কাম সেমটেয়া গাঙর মৌ-না আসি ঘরে হমেয়া তানুর নুওয়ারা-পানির পৌ লইল। আগেদে মৌ-না গারিগ ভরি অইলে সৌ জরম দেনি পেয়া ঘরর বুজনে তেইরাং দ্বায়িত্ব দিলা। এতা কামে তেই জবর চৌহাত। টাউনর ডাক্তার উতার লগে তেইরতা হবা পরিচয়, মাহায় মাহায় ডাক্তার দেহুওয়ানি উহানউ তেই লগ ধরিয়া করিরিগ। দৌ-ওর বৌ কিতা লাগ্লেও তেই মেইপি গ অয়া চাপাল দিলি। এতা কামর কা ঘরর গিরি অউতাই তেইরে রূপা দিলা, জেতালো তেই সংসারর খরচা চালেইলি। হুদ্দা সৌ জরম দেওয়ানি নাগই, বেয়াপার নুওয়ারা-পানি তউ তেই ভরসা অয়া আসিলি।

হাদি হাদিত তেই আমার লেইকি য়েদে বুলাত আইলে, লেইকির সৌ হাব্বি তেইরে বুলিয়া গুরুসাংগর কাদা আহানাত বহাসি ফুংকা হানর কাদাত গিয়া বইলাগা। আবক য়ারি আহান হুনুওয়া বুলে বুলে তেইর লগ না এড়াইলা। তেই-য়ও 'বুড়া হিদল দে', 'হমাজি থম্বেই', 'চালাক হিয়াল' এসাদে এসাদে নিয়াম্পা য়ারি দিয়া সৌ এতারে হারৌ করলি। বেসেপ হান অসে তাই য়ারি আহান লয়নির লগে লগে আরাক য়ারি আহান দে বুলিয়া সৌ এতাই লগ না এড়াইলা। এহানাত্ত জিংতা অনিরকা আবকে পেচ আহান লাগেইল। যেদিন তেইরতা সৌ এতারাংত জিংতা অনি লাগের, তেই য়ারি আহান অকরতইগ

' এসাদে এসাদেতে লাম আহানত্ত পাহিয়া দল কতহান আয়া ডাঙর গাছ আকজারিত গাত আগ পেয়া অউগত থানার কা হমানি অকরলা, আগ হমেইল, আরাক আগ হমেইল,.......আরাক আগ হমেইল,........' এহান মাতিয়া ইম্পানি গ অইলি। সৌয়ে আংকরলা ' পিসেদেতে?' তেই মাতলি ' আরাক আগ হমেইল'। সৌয়ে মাতলা ' হুহ, পাহিয়া এতা হমানি হান লম নার'। তেই মাতলি, ' পাহিয়া হাব্বি হমেয়া লমইলে বাকি য়ারি উহানি দিতউ'. এহান মাতিয়া তেই ফুক কো উঠিয়া সেরেৎ করে নিকুলিয়া গেলিগা। সৌ আ করে আগই আগরে খানি চেয়া থায়া নিজর নিজর ঘরে গেলাগা।

পুরিয়াপন্থীরে আপিল আহান

ব্যক্তিগত অভিজ্ঞতা আহান। সময় উহানাত মুর্শিদাবাদে চাকরি সুত্রে পোস্টিং আসিলু সময়হান। ছুটির দিনে বুলাত গেলুগা ঐতিহাসিক জাগা উতাত। সিরাজুদ্দৌলার কবর, তানুর ঐতিহাসিক মহল বারো আরতাও কিতা কিতি। ঔপেইত মীরজাফরর বংশধর কতগ আসি, তানুর লগে য়ারি-পরি দেনাত গেলুগা উপেইত আজ্ঞয়উ কিত্তাও মাতানি না মনেইলা, লাস্পেয়া ঘরগর দুওয়ারহান ঘাটলা। রিক্সা- ওয়ালা, দোকানদার অউতারে আংকরলু আরো মাতলা, তানু লাস্পেয়া এসাদে করতারা হান, মির্জাফরে কিয়া বিশ্বাসঘাতকতা করল জেহানর কারণে তার বংশধররতা এবাকাও মানুর কথা হুনানি লাগের।

এসাদেই আমার পুরিয়াপন্থী বেইবুনি হাব্বিরাং আপিল আহান, মীরজাফরর বংশধরর ডেকি তুমি বেইবুনির বংশধরও ভবিষ্যতে লাশ নাপাকা, উহানে গেসগা নাগৈ পথ উহানাত্ত ফিরিয়া আহেদিক। সমাজর কোনো বিষয়লো হিনপেয়া থাইলে আমার মুরুশি সংগঠন মহাসভা, সাহিত্য সভা, সাহিত্য পরিষদ,যুব পরিষদ আরতাও অনেক সংগঠনর লগে নিজর মনর হিনর কথা মাতিক, হাব্বি নিজরতা নাই, আপ্নাগাসির হিনহান হুন্তাই তানু এহান বিশ্বাস করুরি।

সামাজিকভাবে ব্যান অইতারাই বুলিয়া ডরপেয়া নিজরে পুরিয়াগ বুলিয়া না ফুকারেয়া বি. এম.ডি.এফ-এ ইম্পানি অয়া থায়া হাব্বি পৌ খমকরিয়া পুরিয়ার মতলবর কামে লাগা পারতারাই বুলিয়া খাল্কররাই উহান ভুলহান, তুমি হাব্বিরে হাব্বিয়ে চিনিয়া থসিহান। তুমি হাব্বি আমার নিজর বেইবুনি, ফিরিয়া আহেদিক, বিষ্ণুপ্রিয়া মণিপুরির ইতিহাসে মির্জাফর অয়া না থাদিক। হাব্বিয়ে বারো কল্করতাঙাই বুলিয়া আশা করুরি।

মর নিজর লেঙ্কা-মারুপ, দাদা গাসিও ওউপেইত য়ওস উহান দেহিয়া হিনহানে আপিল এহান থইলুহান।

ইমা ঠার বারো সৌ

 সমাজর উন্নতির কা চিন্তা করানি, সমাজর কাম করানি, জাত এহান কিসাদে না মাঙনি এহান লো খাল্করানি, ইমা ঠার এহান কিসাদে UNESCOর ENDANGERED LANGUAGE লিষ্ট হানাত্ত নিকুলানি এহান লো

লু-করে খাল্করানি, এতা হাবি লেমেদে মাঙৈতৈ যদি ঘরে আয়া সৌ-জিপুতর লগে ইমা ঠার লো নায়া অন্য ঠার লো টটরলে। নিজে সমাজ সেবি গো, সমাজর কা দাব্দা-ফালদি করেকুরাগ, জাতরকা বারো ইমা ঠাররকা লেকচার দেরগ, লেখালেখি করেরগ, কিন্তু ঘরে আয়া সৌর লগে মানুর ঠার লো টটরলে হৎনা উতা হাবি লেমেদে মাঙৈতৈ। সৌ গৈ ঘরে হিকেরতাই ইমা ঠার এহান কানা নেই ঠার হান, হিকিয়া ভবিষ্যতে কিত্তাও কানা নাইতই ঔহানে হে ঘরে ইমা-বাবায় ইমা ঠার লো না টটরতারা তা নাই; ঔ সৌ ঔগৈ কিসাদে ভবিষ্যতে নিজর সৌ জিপুতরাঙ ইমা ঠার হান জিঙতা করিয়া থৈতৈতা। হান্তে হাজার সমাজ সেবা করলেও, এসাদে অবস্থাত সমাজসেবি ঔগো ইমা ঠার হানরে 'ENDANGERED LANGUAGE' লিষ্ট হানাত হমানির আরাক প্রধান কারণ আহান। বপয়া সমাজ সেবা করানির দরকার না পরের, সমাজর কা কিত্তাও নাকরিয়া হুদ্দা ঘরে সৌ-জিপুতর লগে ইমা ঠার লো টটরিয়া ইমা ঠার হান পরবর্তী প্রজন্মরাং জিঙতা করিয়া থো পারলে ঔহানাত্ত জিঙে আর সমাজ সেবা নেই বুলিয়া নিঙ অর।

এবাকা আহিক বিষয় এহানাত যে ইমা ঠার বাদ দিয়া মানুর উন্নত ঠার হান লো ঘরে না টটরলে সৌ পিসেদে ডাঙরিয়া মানু অনা নুওারতাই। আমার সমাজে, এবাকা পেয়া যতগ ডাঙরিয়া মানু অসি, ঔতা হাবি ঘরে ইমা ঠার লো ডাঙর অসিতা, হায় কতগ ডাঙরিয়া অনির পিসেদে কাদাবারার ডাঙর জাতর লগে মান্না অয়া চলানি মনেয়া মানুর ঠার ঘরে সৌ-জিপুতর লগে দেনা অকরতারা। ঔ সৌ উতারতা পিসে বেজাতিরাঙ ঘর পাতানির প্রবনতাহান নিয়াম অর, জেহান স্বাভাবিক হান। আমারতা সৌ রে ডাঙরিয়া মানু করানির লগে লগে নিজর জাত, ঠার, অস্তিত্ব জিঙতা করিয়া থনার দ্বায়িত্ব হানও আসে এহান পাহুরানি নার।

হান্তে, ঘরে সৌর লগে ইমা ঠার দিক, লগে সৌ-রেও মানু করিক।