বৈষ্ণবাচার বারো বৈষ্ণব রীতিনীতি লো চর্চা করতারা মণিপুরী (মেইতেই বারো বিষ্ণুপ্রিয়া) গিরি-গিথানিয়ে মাত্তারা মণিপুরী বৈষ্ণব এহান কত্তহান বৈষ্ণব সম্প্রদায়রমা শ্রীল নরোত্তম দাস ঠাকুরর সম্প্রদায় হানাত পরের, কিয়া বুল্লে এ সম্প্রদায়র বৈষ্ণব শ্রীল রূপ পরমানন্দ ঠাকুর গিরকে মণিপুরে গিয়া রাজর্ষি ভাগ্যচন্দ্র মহারাজ গিরকরে বৈষ্ণবে দীক্ষিত করেসিল, জেহানাত্ত মণিপুরী (মেইতেই বারো বিষ্ণুপ্রিয়া) বৈষ্ণবে দীক্ষিত অসিলা, যদিও সমাজে এহানও বিশ্বাস আসে যে আমি মণিপুরে আগেত্তই বিষ্ণু-উপাসক বৈষ্ণব আসিলাঙ, পিসে রাজর্ষি ভাগ্যচন্দ্র মহারাজর সময় রাধা-কৃষ্ণ উপাসক বৈষ্ণব অলইলাঙতা। শ্রীল ভুবনেশ্বর সাধুঠাকুর গিরকও শ্রীল নরোত্তম দাস ঠাকুর বৈষ্ণব সম্প্রদায়র বৈষ্ণব শ্রীল কৃষ্ণদাস বৈরাগ্য গিরকরাংত দীক্ষা নেসিল্গা। এহানাত্ত হারপা পারিয়ার শ্রীল নরোত্তম দাস ঠাকুর গিরক এগো আমার সমাজে কতি নিয়াম গুরুত্বপূর্ণ।
শ্রীল নরোত্তম দাস ঠাকুর আজিকার বাংলাদেশর রাজশাহী জেলার গোপালপুরে জরম অসিল। পিসে নাহুমগ লকেইর হিন দেনাই আকয়া ভারতর মুরশিদাবাদ জেলার জিয়াগঞ্জে আয়া বাকি জীবনহান কৃষ্ণভক্তিত কাটাসিল। ঠাকুর গিরক জিয়াগঞ্জর ভাগীরথি তুরেলহানাত শিষ্যর লগে হিনেইতে সেল্কম অলয়া মাঙয়া গেসিল্গা বুলিয়া বৈষ্ণব সম্প্রদায়ে বিশ্বাস আসে। রাজর্ষি ভাগ্যচন্দ্র মহারাজও মণিপুরেত্ত ঠাকুর গিরকর আশ্রম হানাত আয়া দৌর খয়া পাসিল্গা।
শ্রীল নরোত্তম দাস ঠাকুর সমাধি মন্দির এহানাত এবাকা ঠাকুর গিরক, রাজর্ষি ভাগ্যচন্দ্র মহারাজ বারো শ্রীল ভুবনেশ্বর সাধুঠাকুরর সমাধি হঙয়া আসে। সাধুঠাকুরর সমাধি এহান নবদ্বীপর গোবিন্দবাড়ীর প্রাক্তন সেবাইত শ্রী কৃষ্ণকুমার দেববর্মা গিরকে হংকরেসিল। মণিপুরেত্ত হারি বসর এপেইত আয়া বৈষ্ণব চর্চা করেকুরাই রাজর্ষি ভাগ্যচন্দ্র মহারাজর মরনদিন মানেইতারা বার শ্রীল নরোত্তম দাস ঠাকুররে নিংসিঙ অইতারা। আমার সমাজর বৈষ্ণব চর্চা করেকুরাও সমাধি- মন্দির এহান আয়া দর্শন করিয়া কৃষ্ণভক্তি পা পারতারা।
