বিষ্ণুপ্রিয়া মণিপুরী সংস্কৃতির হাবিত্ত আদি এলা বুল্লে মাতিয়ার তায় 'বরণ ডাহানির এলা' হানরে, এহানাত্ত আদি এলা আমারাঙ আর আসে বুলিয়া রেকর্ডে নেই। এলা এহানাত উল্লেখ আসে
'সরারেল রাজারো,..............
খুমলর মাটি হুকেইল,.............
...…......................................
বরণ দিয়াদে দৌ রাজা।'
এহানাত্ত হারপা পারিয়ার খুমল বুলতারা মাটি বা লাম উহানাত বরণ নানির ফলে ঔ মাটির বেয়াপা ঔতায় এলা এহান দিলা হান। প্রাচীন মণিপুরে 'খুমলর মাটি (মেইতেই ঠারেঃখুমন লেইপাক)' বা খুমল বুলতারা লাম এহানাত খুমল (মেইতেই ঠারে খুমন) ডাইনাষ্টির রাজা অউতায় রাজত্ব করেসিলাতা। 'ময়াঙ ইম্ফাল' রাজত্ব এহানর রাজধানী গো অয়া আসিল যেহান লকতাক হ্রদ গর কাদাত অয়া আসে হান। {Ref: Tensuba, Keerti Chand (1993). Genesis of Indian Tribes: An approach to history of Meiteis and Thais}
এপেইত দেসি ছবি এহানাত কলাসরর প্রতাপ সিংহ অজা গিরক বিষ্ণুপুর জেলার নাচৌ গাঙর পথ গো যেহান লকতাকর আকবাজুর পার হানাত গিয়া লমরগা, ঔপেইত উবা অয়া আসে হান। হুরকাঙ নৌ কতগও দেহায়ার যেহানল গাঙর মানু লকতাক হ্রদ গত মাছ দরাত জিতারাগা।
অজা গিরকে আঙুলিগলো দেহুওয়ার লাম উহান অইলতাই 'ময়াঙ ইম্ফাল' যেহান জাগা এহানাত্ত ৪-৫ কিলোমিটার দূরেইত। ঔ লাম উহানরে 'খুমলর মাটি'ও বুল্লা বারো ঔপেইত 'বরণ ডাহানির এলা' এহান হঙনির সম্ভাবনা হান বপ।
খুমলর মাটির লগে বিষ্ণুপ্রিয়া মণিপুরীর সম্পর্ক মালকর লগে সৌ গর সম্পর্ক হানর ডেকি হান। এহানরে আমারতা পাহুরানি থক নাইবো। খুমল মাটির লগে আমার সম্পর্ক হান, মণিপুর মাটির লগে আমার সম্পর্ক হান প্রজন্ম আহানত্ত আরাক প্রজন্ম আহানাত হারপুওয়ানি থক। আমার আদি মাটিরে, আমার আপা- বপাই পালসিলা মাটি রে পাহুরিয়া জাত হান পাল্করানির হৎনা করলে ইতিহাস নেই, অস্তিত্ব নেই জাত আহানর ডেকি মুতোনির সম্ভাবনা হান নিয়াম।
No comments:
Post a Comment