শ্রী শ্রী গোপীনাথ নিরুপণ
নিংথৌখোংগী কালারাজশিং (মৈতৈ ঠারে)
শ্রী শ্রী গোপীনাথ নিরুপণ
নিংথৌখোং'র কালারাজাগাসি (বিষ্ণুপ্রিয়া মনিপুরি ঠারে)
পুল্করিয়া ইকরেসে লেখক
রাজকুমার স্নাতোম্বা (মতুমস্না)
৬ নং পৃষ্ঠাঃ
'মনিপুর ইতিহাস' বুলিয়া রাজকুমার স্নাহল গিরকে লেংকরেসে লেরিক উহানাত মাতেসে ' বিষ্ণুপ্রিয়ার রাজা আগ আসিল, নাং হান্ অইল তায় দাসরাজ।
২৭ নং পৃষ্ঠাঃ
দাসরাজ
দাসরাজ মাত্তারা গিরক এগ মনিপুরর পিঠির লামেত্ত আয়া নিংথৌখোংএ থাসিলগা। তা রাজা আগর দেকি নাং ডাক থাকুরা, নুঙেই অয়া বারো গুণ আসিল মানুগ। তার ঘর-গিথানকর নাঙ হান আসিল তায় অহেল্যা দেবী।তা নিংথৌখোংএ রাজা গো অয়া আসিল সময় অউহান, মনিপুরে রাজর্ষি ভাগ্যচন্দ্র নুওাকো রাজা অসিল সময়হান। তা ভাগ্যচন্দ্রর জবর বানা পেয়া তিলসিল মারুপগ। মনিপুর মাটিত ইরাং কানার সময়'ত ভাগ্যচন্দ্রই দাসরাজ'র লগে পরামর্শ করল। তার'তা মুনি সৌ নাসিল, নিঙল আগ অসিল, নাঙ'হান কেশ্বরী দেবী বুলিয়া থদেসিলা।পিসেদে কেশ্বরী দেবী ভাগ্যচন্দ্রর ঘর-গিথানক অসিলি।
দাসরাজ ভাগ্যচন্দ্রর রাজ্যশাসণে জবর পাংকরল মানু আগ। তা ভাগ্যচন্দ্রর লগে তেখাও (ত্রিপুরা) বার আসামে বুল্লগা। দাসরাজ নিংথৌখোংএ পালয়া আসিল এহান ১) চৈথরোল কুম্ববা ২)মনিপুর ইতিহাস অরায়বা (স্নাহল বিকম) ৩) গেজেট অফ মনিপুর ৪) বিজয় পঞ্চলি (মতুম ঝুলোন) ৫) মালেম হৌফম লেরিক এতাত লেখা আসে।
নিংথৌখোংএ কালারাজার বংশধরে শ্রী শ্রী গোপীনাথ প্রভুর সেবা করিয়া আয়তারা।ঔ বংশধরে আজি পেয়াও দাসরাজ বার অহেল্যা দেবীর তর্পণ দিতারা।দাসরাজ পুখ্রম্বম সাকেই'র ( রাজা লকেই) গো আসিল, গত্র হান মধু-গল্য।ভাগ্যচন্দ্র বারো কেশ্বরী দেবীর পুতক পইলাকার কালারাজা কৃত্তিরধ্বজ সান্দিল্য গত্রর গো আসিল।নিংথৌখোংএ কালারাজার বংশধর এতাই সান্দিল্য গত্রর গো অয়াও ক্যা মধু-গল্য গত্রর দাসরাজ বারো অহেল্যা দেবীর তর্পণ দিতারা এ'প্রশ্ন এহান আহের।কারন হান অইলতাই দাসরাজ বারো অহেল্যা দেবীয়ে কৃত্তিরধ্বজ'রে হুরকাং কালেত্ত ডাঙর করেসিলা, এমনকি হুরকাং কাল এহান কৃত্তিরধ্বজে বপাক-ববাক'রে মালক-বাপক বুলিয়া খাল্করিয়া আহেসিল।
ইকরৌরি মি হারপাসু মতে খাগেম্বার সময় বারো আরতা আরতা রাজার সময়'ত যুদ্ধ'ত ধরিয়া আনেসিলা বিষ্ণুপ্রিয়া এতা পইলা ময়াং-ইম্ফালে আসিলা।পিসে লামাংদং (বিষ্ণুপুর) লাম এহানাত গিয়া থা পরেসিগা। মনিপুরে ভাগ্যচন্দ্রই রাজা অয়া আসিল সময় অউহানাত এরে বিষ্ণুপ্রিয়া এতা মনিপুরর জাগা-জাগাই গিয়া লাম পালসিগা।এসাদেক লাম পালইতে এতা মৈতৈ'র লগে তিলয়া হাব্বি মৈতৈ অ'পরেসিগা।এবাকা মনিপুরে বিষ্ণুপ্রিয়া এতা নেয়ইল বুলানি য়াকরের।গজে ইকরেসু মনিপুরর পিঠিবারাদেত্ত আহেসিি বিষ্ণুপ্রিয়ার গিরি'গ দাসরাজ'র সাকেই হান অইলতাই পুখ্রম্বম (রাজা লকেই) বারো গত্র হান মধু-গল্য জেহান আমার আপা-বপাই বাগাদিয়া গেসিগা।
**********************************************************************
বিশ্লেষণঃ
লেখক গই 'এবাকা মনিপুরে বিষ্ণুপ্রিয়া এতা নেয়ইল বুলানি য়াকরের' মাতেসে কথা এহান সম্পূর্ণ ভুল হান।যদিও লক্তাক'র কাদা বারার বিষ্ণুপ্রিয়া মনিপুরি এতা মৈতৈ বিয়া করিয়া, মৈতৈ ঠার দিয়া মৈতৈ অলয়া আসি, তেব মনিপুর রাজ্যর ভিতরে আসে জিরিবাম'এ বিষ্ণুপ্রিয়া মনিপুরি ঠার দেকুরা, বিষ্ণুপ্রিয়া মনিপুরি পরিচয় দেকুরা নিয়াম্পা গাঙ'র মানু আসি।
এ বিষয় এহানল এবাকার নিংথৌখোং'র কালারাজার বংশধর শ্রী রাজকুমার রাধামোহন সিংহ'রে আংকরতে মাতের লেখক গো নিয়াম বয়স অয়া লেরিক হান ছাপা নুওারল উপেইত মৈতৈ আগই লেখকর লেখা অউহান নিয়া বাক্কা জাগাত বদলেয়া ছাপা বেলাসে। অউহানল রাধামোহন সিংহ নিজেও নুঙেই নাপাসে। তা মাতের মনিপুরে বিষ্ণুপ্রিয়া নেই, অউহান সারাও আরাকউ নাগই তথ্য বরাসে ঔ ছাপেইল মৈতৈ গিরক অউগই। তা বারো ঔ তথ্য অউতা ঠিক করেসে বারো নুওাক লেরিক এহান ছাপেইতই বুলিয়া কথা দিল।
শ্রী রাজকুমার রাধামোহন সিংহ, গিরক এগ নিংথৌখোং'র গো। তা নিজরে বিষ্ণুপ্রিয়া মনিপুরি গো বুলিয়া পরিচয় দের।আহের সময়'ত তা'র দেকি মানু মনিপুরে আমার পরিচয় সরকারি'ভাবে লেপকরতে পাংকাল দিতই সইনেই। হবা দিন বাসেয়া থাইলাং।
