তম্বি আবকর ফুংকা য়ারি

১৯৯৪-৯৫ ইং মারির উগদে তম্বী আবকর বয়স ৫৪-৫৫ অ থাইব। বিয়া অয়া গাঙে আহানির পিসে সংসার হান সৌ-শুমারা লো পইলাদে খানি হিনপেইল, তেইর গিরক অউগ নুওয়ারা-পানিল খেতির কাম নিয়াম করে নুওয়ারানির কারণে। বিয়ানে কওয়া গর কা করানির আগে তেই ঘুমেত্ত উঠিয়া, লাঙৌ হান য়াত কাকরিয়া ফিতুপ আহান বেরেয়া বারো আরাক ফিতুপ আহান মুরগত বাধিয়া বিড়ি আগ জ্বালেয়া লপুকেদে নিকুলতইগ। লপুকর কাম সেমটেয়া গাঙর মৌ-না আসি ঘরে হমেয়া তানুর নুওয়ারা-পানির পৌ লইল। আগেদে মৌ-না গারিগ ভরি অইলে সৌ জরম দেনি পেয়া ঘরর বুজনে তেইরাং দ্বায়িত্ব দিলা। এতা কামে তেই জবর চৌহাত। টাউনর ডাক্তার উতার লগে তেইরতা হবা পরিচয়, মাহায় মাহায় ডাক্তার দেহুওয়ানি উহানউ তেই লগ ধরিয়া করিরিগ। দৌ-ওর বৌ কিতা লাগ্লেও তেই মেইপি গ অয়া চাপাল দিলি। এতা কামর কা ঘরর গিরি অউতাই তেইরে রূপা দিলা, জেতালো তেই সংসারর খরচা চালেইলি। হুদ্দা সৌ জরম দেওয়ানি নাগই, বেয়াপার নুওয়ারা-পানি তউ তেই ভরসা অয়া আসিলি।

হাদি হাদিত তেই আমার লেইকি য়েদে বুলাত আইলে, লেইকির সৌ হাব্বি তেইরে বুলিয়া গুরুসাংগর কাদা আহানাত বহাসি ফুংকা হানর কাদাত গিয়া বইলাগা। আবক য়ারি আহান হুনুওয়া বুলে বুলে তেইর লগ না এড়াইলা। তেই-য়ও 'বুড়া হিদল দে', 'হমাজি থম্বেই', 'চালাক হিয়াল' এসাদে এসাদে নিয়াম্পা য়ারি দিয়া সৌ এতারে হারৌ করলি। বেসেপ হান অসে তাই য়ারি আহান লয়নির লগে লগে আরাক য়ারি আহান দে বুলিয়া সৌ এতাই লগ না এড়াইলা। এহানাত্ত জিংতা অনিরকা আবকে পেচ আহান লাগেইল। যেদিন তেইরতা সৌ এতারাংত জিংতা অনি লাগের, তেই য়ারি আহান অকরতইগ

' এসাদে এসাদেতে লাম আহানত্ত পাহিয়া দল কতহান আয়া ডাঙর গাছ আকজারিত গাত আগ পেয়া অউগত থানার কা হমানি অকরলা, আগ হমেইল, আরাক আগ হমেইল,.......আরাক আগ হমেইল,........' এহান মাতিয়া ইম্পানি গ অইলি। সৌয়ে আংকরলা ' পিসেদেতে?' তেই মাতলি ' আরাক আগ হমেইল'। সৌয়ে মাতলা ' হুহ, পাহিয়া এতা হমানি হান লম নার'। তেই মাতলি, ' পাহিয়া হাব্বি হমেয়া লমইলে বাকি য়ারি উহানি দিতউ'. এহান মাতিয়া তেই ফুক কো উঠিয়া সেরেৎ করে নিকুলিয়া গেলিগা। সৌ আ করে আগই আগরে খানি চেয়া থায়া নিজর নিজর ঘরে গেলাগা।