মুঙেদে ঙালইতই, সইনেই
হাইহান এহান, এব্বাকা 'ছ' বারো ' স' লো খানি থেইনা অসি; রাজারগাঙ-মাদইগাঙ লো এবাকাও কতগই খেইনা-খেইনি করানি মনেইতারা; উত্তর শিওর- দক্ষিণ শিওর, ঘাগারা-চেংকুরি লোও দিতুপ অসি, আরতাও কততা থা থাইব।
না পাহুরবাঙ আপা-বপারে। নিজর ঘর, লাম, খেতি, লকতাক বারো নিজর কততারে বেলেয়া মণিপুর মাটিত্ব টেঙারা, খাল, বিল লালয়া আয়া লাম পাতেসিগাতা; জেহানর কারণে আজি আমি নিজর পরিচয় আহানল জিংতা অয়া আসিতা। আমার আপা-বপা গাসিয়ে যে খারাপ দিন অউবাকা দেহেসি, অউতার কিঞ্চিত আহানও নাগই এবাকার দেহিয়ার খারাপ দিন এতা। তানুও মন না বাগিয়া পরিস্থিতির লগে লাকাটি দিয়া জিঙিয়া আজি আমারে এপেইত ফউকরলাগাতা, আমিও আমার আপা-বপার দেকি মন না বাগিয়া মেইথি অইক, মুঙেদে ঙালইতই সইনেই।
মণিপুরে বেলেয়া আহেসিলা নিজর বেইবুনি অউতার কততারে মায়ান্মারে যুদ্ধ- বন্দি করিয়া নিয়া গেসিলাগা অউতাই কতদিন নিজর ইমার ঠার হান জিংতা করিয়া থসিলা, কিন্তু কাদাবারার ডরে এবাকা ঠার হান মিমুত অনার পথে, পরিচয় হান্তে মাংকরিয়া হদাসি। মণিপুরে আসি উতাও জিংতা অয়া থানার কারণে খাই অলয়া আসি। এতা হাবি হিনর দিন এতা দেহিয়াও আমার আপা-বপাই ঠু-নিংশা বেলাসি হাইহান, কিন্তু আশা না এরাদেসি। আমারে পথ দেহুয়াসি, পরিচয় দেসি, পরিস্থিতির লগে লাকাটি ধরেসি।
এবাকা, আপা-বপা তোমার অউগদে চেয়া আসি। তুমিই আশা, তুমিই ভবিষ্যৎ। চেরৌর দিনে তুমি দিতারাই চাক-লুক হান বাসেয়া আসি আপা-বপাই। কিতা করতারাই, তুমি চেই।
Comments
Post a Comment