ইমা ঠার দিতারা আরাক জাতি আহান, নাঙ হান 'শিবপুরিয়া'
কলিকাতার গড়িয়া বাজারে সব্জি লনাৎ যাওরিগা উপেইৎ ২০-২৫ বছরর মুনি সৌ আগর লগে উনা অর মেরাক মেরাকে, সাৎ হান আমার মানুগো মাল ( ঔরে যেসাদে গারিগর মাচু হান হেইরাপ বাদামি, আহিগি মৈতৈর ডেকি হুরকাঙ হানৌ নাগৈ, বাঙালির ডেকি ডাঙর হানৌ নাগৈ, মেরাক সেরাক। শিলচর, কলাসর, ভানুগাছ, মণিপুরর বিষ্ণুপুরর গাঙ ঔতাত আসি আমার মানু ঔতা যেসাদে চেইতে)। বাজারে তারে দেখলে মিয়ৌ তারে কুপকরে চাউরি, তাও মরে কুপকরে চার; পিসে তা সেচিয়া যারগা। এসাদে কত্তখুরুম অসে, মি আঙলাক করিঙ বুলতে তা সেচিয়া যারগা। তা মর লগে অতারানি না মনার পাউরি। আগদিন্তে মি মেইথি অয়া গিরক উগরে বাজারে পথ আটকেয়া আঙকরলু, তি আমার মানু গো থাঙ? জবাব নাদলো। মি বারো আঙকরলু, তি বিষ্ণুপ্রিয়া মণিপুরী গো থাঙ? বারো জবাব নাদিয়া আহিগি সেচার। মি বারো আঙকরলু আরো, কাদাত উবা অয়া আসে বুজন আগৈ মাৎল, বাবা আমি বিষ্ণুপ্রিয়া মণিপুরী নাগৈ। মি খাঙ লাগলু, আমার ঠার হানৌ দের, বিষ্ণুপ্রিয়া মণিপুরী নাগৈ য়ও বুলের। হান্তে কিসাদেতে? বুলিয়া আঙকরলু। বুজন গৈ মাৎল, 'আমি শিবপুরিয়া। তুমি গৌড়ীয় বৈষ্ণব মানরাই, লৌকিক দৌ আপকপা, লামর দৌ, পাহাঙপা মানরাই, আমি ঔতা নাকরিয়ার। আমি মহাদেব ছাড়া আরতা কুনো দৌ রে নাকরিয়ার। হুদ্দা শিব রে হমাদিয়ার, উহানে আমি শিবপুরিয়া।' এহান মাতিয়া বুজন উগৈ মরে হুরকাঙ লেরিক আহানও দিলো ' আমি শিবপুরিয়া' নাঙে। মরতা জাঙর তলে মাটি হান বিসারেয়া নাপাওরি পারা। আঙকরলু, তুমারতা কতিহান্তে মানু অসো। মাৎল, বাক্কা অসি, আরাকও বারের।
হৈমারো, এহান্তে কিহান হে বুলিয়া মুরগত আতহান দিলু। পুরিয়া আকতাই সমাজ হান করৎ করৎ করিয়া মাঙকরানির হৎনা করিয়া আসি, অউতার গজে বারো শিবপুরিয়া বুলিয়া আরাক আকতা নিকুলিল তা কো।
খাঙতা, কওয়া আগর কা কা আওয়াজ হান হুনুরি। আহিগি মেলিয়া চেইতে বিয়ান হান ফুওয়াসে। বিয়ান ৫ তা ১০ বাজের। উঠিয়া বয়া খালকরলু, হপন হান অসেতাকো, জিঙতা করলে থাঙজিঙ গিরক (মি মৈরাঙ গো লকেই হান্তে আমার আপকপা গো থাঙজিঙ গিরক) বুলিয়া হমাইলু।
মনে চিন্তা আহানৌ লাগিল, গাঙর ঘরে বুড়িমা থাইতে মাৎল, বিয়ানকার হপন এতা ফলের বুলিয়া। পুরিয়ার ডেকি শিবপুরিয়া বুলিয়া আরাক আকতা নিকুলে পরলেগাতে!
**** হুত্তুমে হপন হান ****
Comments
Post a Comment