মায়ান্মারর লিনজিন গাঙর মানু এতা মাদৈগাঙ:

কতদিন আগে কাঙর পালির সময়ত ফেইসবুকে মায়ান্মারর Sagaing Region র শহরর মালঠেপ আগত জয়দেব দেনির ভিডিও আহান ভাইরেল অসিল। বপ মানুয়ে খাল্করলা এতা আমার মানু পারে বুলিয়া, সাতৌ আমার ডেকি অসে হান্তে। আসলে ঔ মানু অউতা হাব্বি বামুন (যেতারে মায়ান্মারে পাওনা বুলিয়া মাত্তারা), মৈতৈ ঠার দিতারা বামুন। যদিও এবাকা হুদ্দা বুজনে মৈতৈ ঠার দিয়া পারতারা, কিন্তু নুওা তেঙ্কালরতাই মৈতৈ ঠার নুওারতারা, তানু বার্মিজ ঠার দিতারা।

কিন্তু এরে Sagain Region র ভিতরে পালয়া আসে লিনজিন গাঙর মানু এতা কাথে-আক্কাবাট, জেতারে হুদ্দা আক্কাবাট বুলিয়াও মাত্তারা। মায়ান্মারে কাথে মানে মণিপুরী, কাথে-আক্কাবাট মানে আক্কাবাট-মণিপুরী, যেহান তানু কাথে ( মৈতৈ মণিপুরী) রাংত তঙালক পরিচয় দেসিহান। ফ্রান্সিস বুচাননে মায়ান্মারর আক্কাবাট ঠারর শব্দর যে লিস্ট আহান করেদিয়া গেসেগা উয়ানর লগে আমার বিষ্ণুপ্রিয়া মণিপুরী শব্দর হুবহু মিল পেয়ার, যেহান আমি আগে আলোচনা করেসি।

তানু এবাকা ধর্মীয় ভাবে বৌদ্ধ ধর্ম পালন করতারা। কিন্তু, উহানর লগে মণিপুর মাটির লৌকিক ধর্ম উহানউ পালন করতারা, যেমন আপকপা হমাদেনি বারো গিথানি হমা দেনি। গরর ভিতরে সেঙ জাগা আহানাত পানির গ্লাস আহানর গজে পাতা আহানল গুরিয়া ফুল দিয়া থৈতারা বারো গিথানি দৌ গ বুলিয়া নিক্কা হমাইতারা। হাপ্তাত আকদিন তানু ঔ গ্লাস উগর পানি বদলেইতারা। এহান তানু এবাকাও গরে গরে পালন করতারা। বারো গাঙর মানুয়ে তিলয়া গিথানির মন্দির আগৌ হংকরেসি, যেহানর ভিডিও লগে দেনা অইল। গিথানি হমাদেনি এহান বিষ্ণুপ্রিয়া মণিপুরীর মা মাদৈগাঙ অরাং প্রচলন এহান আসে, কিন্তু রাজারগাঙ অরাং নেই। হান্তে, এরে লিনজিন গাঙর মানু এতা মাদৈগাঙ, এহানর ইঙ্গিত আহান দের।

ভিডিওঃ চন্দ্র কুমার শর্মা, মান্দালয়, মায়ান্মার

ভিডিওর ফামহানঃ লিনজিন গাঙ, Sagaing Region, মায়ান্মার